Shimfiɗa
Kamar yadda aka saba kowace shekara majalisar dinkin duniya ta na ware 12 ga watan 8 a matsayin ranar matasa ta duniya, hakan na zuwa ne, domin nuna muhimmancin da matasa suke da shi a cikin al'umma.
Salam
Ko shakka babu matasa sune ƙashin bayan ci gaban kowace al'umma a duniya, babu wata kasa ko al'ummar ƙasar da zasu ci gaba matukar bada matasa ba, sannan ƙasa tana samun naƙasu sosai matuƙar ta mayar da matasanta saniyar ware. Idon muka kalli mafi yawa daga cikin ƙasashen duniya, musamman masu tinƙaho ta ɓangare kimiyya da ƙere-ƙere haɗi da tattalin arziki, wannan nasarar ta samo asali ne ta sanadiyar an dauki matasa da muhimmanci, an jawo su a jiki an nuna masu kowace irin kulawa, sannan aka tusa masu son ƙasa haɗi da kishinta.
Najeriya tana cikin jerin ƙasashen duniya masu tinƙaho da yawan matasa, haka itace ƙasa mafi ƙarfin tattalin arziƙi a ƙasashen Afrika ta yamma, sannan ita ce ƙasa mafi yawan al'ummomi mabambanta, da kuma yaruka daban-daban. Sannan tana cikin ƙasashen duniya masu ƙarfin faɗa a ji a duniya, sannan ita ce ƙasa wadda mafi yawa daga cikin mutanenta bakar fata ne, masu jurewa kowace irin gwagwarmaya ta yau da kullum, sannan tana cikin ƙasashen da ke da tarin addinai da dama mabambanta.
Idan muka kalli wasu daga cikin jerin ƙasashen duniya da suka ci gaba, musamman a yankin turai, duk da kasancewar ƙasashen mutanensu waɗanda ko a junansu basu cika yadda da su ba, to amma duk da haka suna samun gagarumin haɗin kai wajan gina ƙasa haɗi da cigabanta. Wannan ya sa sun ka baiwa matasansu fifiko wajan gudanar da wasu ayyuka musamman abubuwan da suka shafi yin nazari da himmatuwa wajan bincike akan laluɓo hanyoyin kawo sauye-sauye a cikin ƙasashensu, wanda hakan ya basu damar riƙe kambun ƙasashe masu ƙarfin tattalin arziki, da kuma yiwa sauran ƙasashe zarra wajan samar da kayan ci gaban ƙasa. Misali; kamar manyan wayoyin hannu, na'urori masu aiki da kwakwalwa, da dangoginsu.
Idan muka yi nazari a tsanake, zamu daɗe muna dasa ayar tambaya akan to wai me yasa mu a Afrika har yanzu mun ka kasa ta ɓangaren irin wannan ci gaba. Bari mu dawo Ƙasarmu ta gado. A Najeriya akwai ɗinbin Matasa waɗanda Allah ya baiwa fasaha ta ɓangarori da dama, wanda wasu daga ciki sun kware wajan iya zane, wasu sun kware a ɓangare iya sarrafa ƙarafa, waɗansu sun kware a ɓangare injiniyanci, wasu kuma sun kware ta fuskar samar da abubuwan more rayuwa da dai wasu fannoni masu matuƙar yawa. To amma ina gizo yake saƙar? Ta wannan sashen kam sai mu dora alhakin wannan ga shugabanni, domin su suke da alhakin bincike haɗi da zaƙulo masu baiwa ta taimakawa ƙasa, domin ƙarfafa musu gwiwa ta kowane fanni, domin ganin an bunƙasa ƙasa ta kowane hauji.
Babu maraya sai raggo! Ko shakka babu a matsayinmu na matasa masu tasowa, bai kamata mu matsaya ci ma kwance ba, ya zama wajibi mu tsayu da kafafunmu wajan dogaro da kanmu domin biyan buƙatun kanmu, baya zama dalili ga matashi ya ce tun da yayi karatu mai nisan zango, ya zauna sai ya samu aikin yi daga wajan gwamnati ba, kasancewar matuƙar dambu ya yawa bayajin mai, ya kamata matashi ya sa a ransa idon yayi karatu yayi ne domin kariyar mutuncin shi, ba don ya samu aiki daga wajan gwamnati ba, mu daina raina sana'a komai ƙanƙantarta domin bamu san inda arziƙinmu ya ke ba, mu tashi kawai mu fantsama wajan nema, insha Allahu da sannu wata rana zamuyi gamdakatar.
Ba ya zama dalili, a matsayinmu na matasa muyi nazarin daukar makamai muna tare hanyoyi, garuruwa, da ƙauyuka muna ansar dukiyoyin 'yan uwanmu, domin wannan baya zama cikin jerin aikin mazantaka, matashi jajirtacce shine wanda ke gwagwarmayar neman halal cikin kowane yanayi, saboda haka ya na da kyau mu chanza tunane daga marar kyau zuwa wanda ya dace, hakan zai sa mu gina rayuwa mai inganci wadda bata da fargaba.
Kowa a cikin ƙasar nan akwai irin gudunmuwar da zai iya bayarwa wajan gina ta haɗi da ci gabanta, mu dai kasance kawai jekadu na gari a duk inda mun ka tsintsi kanmu, mu kasance masu gaskiya da riƙon Amana, masu alkawari da kuma kaucewa cin amana, hakan zai taimaka mana wajan gina kanmu da kuma ƙasarmu.
Babu wata ƙasa da zata ci gaba matukar al'ummarta basu da haɗin kai, domin sai an samu haɗin kai da kaunar juna sannan za a samu dukkan ci gaban da ake buƙata. Ina addu'ar Allah ya kawo mana lafiya da zama lafiya a Najeriya da Afrika dama duniya baki daya.
Barka da ranar Matasa ta Duniya
Happy International Youths Day
Daga Nura Muhammad Mai Apple Gusau Shugaban Ƙungiyar Matasa 'Yan Gwagwarmaya ta Ƙasa da Ƙasa. 08133376020
Comments
Post a Comment